Súlur stálgrindarhús ehf. vinnur að uppsetningu á nýrri vélaskemmu í Hlíðarfjalli – Vaxandi eftirspurn eftir stálgrindarhúsum á Íslandi
2. október 2024
Fyrirtækið Súlur Stálgrindarhús ehf. er dótturfyrirtæki Slippsins Akureyri sem stofnað var fyrir ári síðan. Undanfari stofnunar fyrirtækisins var viðamikið verkefni sem Slippurinn hafði með höndum við að reisa nýbyggingu Húsasmiðjunnar á Selfossi og var í framhaldinu tekin ákvörðun um að stofna fyrirtæki um verkefni í byggingariðnaði með sérstakri áherslu á stálgrindarhús, enda mikil þekking á stáli innan samstæðunnar. Súlur Stálgrindarhús ehf. býður tilbúin innflutt stálgrindarhús á íslenskum markaði og er þessa dagana að reisa 800 fermetra vélaskemmu á skíðasvæðinu í Hlíðarfjalli. Kristján H. Kristjánsson, framkvæmdastjóri fyrirtækisins, segir talsverða eftirspurn og næstu verkefni þegar komin í hönnunar- og undirbúningsferli.
18 vikna afgreiðslutími frá Kína
Stálgrindarhúsin koma hingað til lands tilbúin til uppsetningar, bæði stálvirkið sjálft, yleiningar, gluggar og hurðir. Húsin eru framleidd í Kína og eru CE vottuð og segir Kristján að reikna megi með um 18 vikna tíma frá því allar arkitektateikningar liggja fyrir þar til húsin eru komin á verkstað á Íslandi, tilbúin til uppsetningar.
„Til að enginn vafi leiki á gæðum þessara húsa þá fengum við óháða alþjóðlega þýska vottunarstofu, TÜV SÜD, til að taka út framleiðslu vélaskemmunar þegar það var í framleiðslu í Kína og sú úttekt staðfesti að húsin eru í hæsta gæðaflokki. Enda sjáum við það í uppsetningarvinnunni núna að það stenst allt upp á punkt og prik,“ segir Kristján en sjálfur er hann menntaður húsasmiður og byggingafræðingur en starfaði áður um nokkurra ára skeið hjá Slippnum Akureyri.
Lausn sem er vel samkeppnisfær
„Við fáum mikið af fyrirspurnum um þessar lausnir okkar víða að úr atvinnulífinu, bæði frá viðskiptavinum til sjávar og sveita,“ segir Kristján en þyngri fjármögnun vegna hárra vaxta segir hann helst birtast í því að undirbúningsferli framkvæmda taki lengri tíma en áður. Markaðurinn sé hins vegar augljóslega fyrir hendi.
„Fyrirspurnir hafa komið til okkar að undanförnu um smærri sem stærri hús, allt upp í um 3.500 fermetra að stærð. Við getum boðið allar stærðir stálgrindarhúsa og í reynd eru engin mörk á því. Ég hef sjálfur skoðað verksmiðjuna í Kína og veit að þar er núna verið að framleiða hús sem er 20.000 fermetrar að stærð svo að fyrirtækið hefur vítt framleiðslusvið,“ segir Kristján. Aðspurður segir hann þróun í verði á stáli og flutningum í rétta átt að undanförnu og að það styrkir samkeppnisstöðu fyrirtækisins enn frekar.
„Þetta eru hús sem eru mjög vel samkeppnisfær á íslenskum markaði og góður valkostur fyrir fjölbreytta starfsemi,“ segir Kristján.
Stefnt á verklok í Hlíðarfjalli í nóvember
Á næstu dögum verður lokið við uppsetningu stálvirkisins í áhaldahúsinu í Hlíðarfjalli og þá tekur við klæðning yleininga og frágangur. Kristján segist vonast til að veðurguðirnir verði framkvæmdinni hliðhollir í haust og að hægt verði að ljúka við húsið í nóvembermánuði. Upphaflega var ætlunin að reisa húsið haustið 2023 en tafir á öðrum verkþáttum urðu til þess að samkomulag var við verkkaupa um að seinka framkvæmdinni um eitt ár.
„Hönnunarferli hússins seinkaði í fyrra og steypa á sökklum og millilofti hófst ekki fyrr en í byrjun júní í sumar en stálgrindin kom til landsins í júní og yleiningarnar í ágúst. Við hófum síðan vinnu við uppsetninguhússins strax og allar undirstöður voru tilbúnar,“ segir Kristján en auk starfsmanna Súlna Stálgrindarhúsa ehf. koma starfsmenn frá Slippnum Akureyri að uppsetningarvinnunni. Kristján segir fyrirtækin þannig geta lagt saman krafta sína í verkefnum þegar á þarf að halda.
„Okkar séráhersla er á stálgrindarhúsin en samt sem áður tökum við fjölbreytt önnur verkefni að okkur á byggingarsviðinu. Dæmi þar um er umsjón með breytingum á húsnæði fyrir frumkvöðlasetrið Drift EA í Landsbankahúsinu við Ráðhústorg sem smiðir á okkar vegum eru að ljúka um þessar mundir. Við erum því nýtt félag á byggingamarkaði og getum boðið okkar þjónustu og hús til viðskiptavina hvar sem er á landinu,“ segir Kristján H. Kristjánsson.
Students from the GRÓ Fisheries Training Programme, along with Hreiðar Þór Valtýsson, Associate Professor at the University of Akureyri, during a visit to Slippurinn in Akureyri.
Nemendur frá GRÓ Sjávarútvegsskólanum ásamt Hreiðari Þór Valtýssyni dósent við Háskólann á Akureyri í heimsókn hjá Slippnum á Akureyri.
Slippurinn Akureyri og Íslenska Gámafélagið (ÍGF) hafa gert með sér samning um heildstæða sorphirðuþjónustu með skýra áherslu á flokkun og aukna endurvinnslu. ÍGF mun annast sorphirðu hjá fyrirtækinu og beita lausnum sem draga úr umhverfisáhrifum starfseminnar og stuðla að sjálfbærni í rekstri. Innleiðing nýs kerfis hefst eftir sumarleyfi starfsfólks, en stefnt er að fullri útfærslu í haust. Með betri flokkun og meðhöndlun úrgangs má bæði auka nýtingu hráefna, draga úr orkunotkun og minnka mengun. Á sama tíma skapast aukin hagkvæmni þar sem förgunarkostnaður fer hækkandi.
New Handfilleting Line from DNG
Ný handflökunarlína frá DNG
Stephen Merricks, tæknistjóri hjá Abyss AS í Kristiansund, um borð í Fosnafjord
