Árið 1995 hóf DNG framleiðslu C6000 færavindunnar sem óhætt er að segja að hafi verið byltingarkennd framþróun í handfæraveiðum á Íslandi og sú vinda síðan verið leiðandi veiðibúnaður í handfærabátum. Þó C6000 vindunni hafi í grunninn lítið verið breytt á þessum 30 árum þá hefur hún verið í stöðugri þróun en C6000 vindan er enn þann dag í dag algengasta handfæravinda í smábátaflotanum. Vegna framþróunar á heimsmarkaði í rafeinda- og hugbúnaði er svo komið að íhlutir í vinduna, svo sem skynjarar, skjáir og ýmis rafbúnaður eru ekki lengur framleiddir hjá birgjum DNG og ill- og ófáanlegir í heiminum. Af þessum sökum og að staðan versnaði verulega á meðan á Covid faraldrinum stóð var framleiðslu á nýjum C-6000 vindum hætt. Í stað hennar hefur verið þróuð ný vinda, R1, sem nú er komin á markað og er enn fjölhæfari og öflugri en forveri hennar. Við þróun R1 vindunnar var lögð rík áhersla á keip hennar þannig að hún haldi fiskinum sem best á færinu. Óhætt er að segja að nýja R1 vindan sameina alla bestu eiginleika forvera sinna jafnframt því að byggja á nýjustu tækni og skila auknum afköstum við handfæraveiðar. Þjónustu við C6000 hætt í áföngum Sem fyrr segir er nú orðið erfitt og í sumum tilfellum ómögulegt að fá nýja íhluti í C6000 vindurnar og mun þjónustu við þessa tegund færavinda hjá DNG verða hætt í áföngum á næstu tveimur árum. Frá 15. mars næstkomandi verður þjónustu hætt við vindur eldri en 2005, frá 1. janúar 2027 verður þjónustu hætt við vindur eldri en 2012 og frá 1. janúar 2028 verður þjónustu hætt við vindur eldri en 2020. Ármann Guðmundsson, þjónustustjóri DNG, segir þessar breytingar nauðsynlegar en að fyrirtækið hafi jafnframt tryggt að eiga helstu varahluti á lager til að unnt sé að fylgja framangreindri þjónustuáætlun við notendur. „Hér er um að ræða íhlutaframleiðslu sem er orðin áratuga gömul og eðlilega kemur að þeim tímapunkti að hún víki fyrir nýjungum. Við höfum því tekið okkur tíma til að undirbúa þessar breytingar fyrir okkar viðskiptavini vel og stærsta atriðið er að geta boðið okkar notendum nýju R1 vinduna í stað þeirrar gömlu,“ segir Ármann. Gamla vindan sem greiðsla upp í nýja Nýja R1 vindan frá DNG hefur fengið mikið lof hjá smábátasjómönnum sem hafa notað hana. Vegna þeirra þjónustubreytinga sem nú verða við C6000 vinduna mun DNG taka gamlar vindur sem greiðslu upp í nýjar R1 vindur. „Þetta er uppfærslutilboð að verðmæti um 100.000 kr. fyrir hverja vindu eldri en 2005 og nýrri vindur sem ekki er hægt að koma aftur í notkun. Þetta tilboðið er nú þegar orðið virkt hjá okkur og gildir til ársloka 2026,“ segir Daði Tryggvason, verkefnastjóri DNG. „Auk þess bjóðum við sérstaka ráðgjöf þar sem eigendur C6000 vinda geta komið með þær til okkar og við metum ástand hverrar vindu og ráðleggjum um viðgerð, yfirferð eða uppfærslu eftir því sem hagkvæmast er að gera. R1 vindan hefur reynst framúrskarandi vel hjá þeim smábátasjómönnum sem hafa tekið hana í notkun. Við vitum að við höfum því mjög góðan valkost að bjóða okkar viðskiptavinum.“

Farþegaskip til sölu – IMO 9015175 (áður Arctic Circle) Slippurinn Akureyri kynnir nú til sölu farþegaskip sem hefur gengið í gegnum gagngerar endurbætur og hentar einstaklega vel til farþegaflutninga og hvalaskoðunar. • 150 farþegar (stækkanlegt í 200) • Hámarkshraði 26–28 hnútar • Fullbúið og tilbúið til reksturs strax • Afhending á Akureyri